Adinberriren eskutik, goizero ETBn egiten den programa berezia: Iñigo Vicens prestatzaile fisikoarekin kirol saio irekia, eta jarraian, mindfulness terapia Raquel Rodríguezekin eta estimulazio kognitiborako tailerra Naia Ros-ekin.

Sare-sozialekiko adikzioa, gaitasun sozialen galera, suizidioaren hautua... hiperkonexioaren eraginak dira soilik? Gazteak izango dira euren ongizatean eragina duten faktore desberdinak azaleratu eta eztabaidatuko dituztenak. 

Desgaitasun intelektuala eta gaitz mentalak dituzten herritarrekin Why Not Fundazioaren podcast irratsaioa: egunerokotasuna, zailtasunak, erronkak eta ametsak.

Haurren ongizate emozionalean, sozialean zein fisikoan duten eraginagatik, mugikorren eta teknologia digitalen erabilera arduratsua eta osasungarria bultzatzeko saio dinamikoa Altxa Burua elkartearekin. Bereziki gurasoei bideratutako saioa.

Nola bizi da norbere jaioterria utzi eta herri ezezagun batean integratzeko eta bizi proiektu berri bat garatzeko prozesua? Eta, nola jasotzen ditugu kultura desberdinetatik datozen herritar berriak? 

Oztopoak eta aukerak, bizipenak eta ohiturak, beste hainbat gaien artean hizpide izango ditugu begiradak partekatzea bilatzen duen topaketa honetan.

Leo Bueriberi bakarrizketagile, DJ eta komunikatzailearen parte hartzearekin. 

Jakoba Errekondo agroekologian adituarekin solasaldi irekia. Paisajista, agronomoa eta agroekologian adituak, elikadura arduratsu eta jasangarriaren gakoak azalduko dizkigu, eta honekin batera arituko dira bi abeltzain euren esperientziak kontatzeko: Legazpiko Agirrezabal baserriko Joseba Andueza eta Urretxuko Agerre baserriko Iñaki Sasieta.

Aukeratzen ez den bakardadea ez da soilik adin tarte baten arazoa. Hirugarren adinari bezala gazteengan geroz eta eragin gehiago duen arazo bat da.  Ados teatroak bakardadearen inguruan ekoiztutako hiru mikrodokumentalen eskutik, beste horrenbeste herritarren kasu erreal bezain gordinak gertutik ezagutuko ditugu.

Nola bizi zuten gaztaroa gure aiton amonek eta nola bizi dute gaurko gazteek? Nola aldatu dira belaunaldi gutxietan emozioen kudeaketa, sexualitatea, harreman sozialak, emantzipazioa eta aisialdia bizitzeko eta ulertzeko moduak? Topaketa honetan, desberdintasunetatik abiatu eta, elkarrekiko ikaskuntzak aurkitzea eta adinetik harago lotzen gaituzten balioak eta esperientziak aurkitzea bilatuko dugu.

LaBbatu batukadaren saio berezia eta ondoren pintxo poteoa.